Aru Cunsigliu Cumunali.
L'ata vota, aru Cunsigliu Cumunali,
s'avijni piglià dicisioni 'mpurtanti,
sup'a certi cosi, sicunn'u Principali,
ca riguardavini sti poviri imigranti.
Ma cumi ghè, cum'unnè, l'à scappata:
“il mio intervento non ammette replica”
à ditti, ccù l'uucchi stuurti e i jiditi gazati,
e parìa cà ni vulissa fà na bella prijdica.
Rapiti cijli! Tutti chiri i l'opposizzioni,
cumi si fussiri stati muzzicat'i na vespa,
s'ani alluntanati i stà specia i riunioni,
e u Cunsigliu an'abbannunati lestu lestu.
A mmia, frustijri 'ndu munnu oramai,
epperò sembi 'nnammuratu i stu paisi,
cù tutt'u spinnu, mi dola e dispiacia assai:
un ci vulìa manchi cridi a chiri c'ai 'ndisi.
“Tarsia bene comune”, accussì vi chiamati,
m'assumbra ca su sulamende paroli vacanti;
'mmeci i lavurà tutti 'nsijmi, l'uni ccù l'ati,
l'opossizziona va vulissiti 'ncarrà davanti.