'U pruvissuri dà musica (il maestro Ciliberti).
M'àccuut'ara scola cà ghèra guagliunu
ppì mmì nsignà i noti, gùna appidùna;
tinijssi ì lizzioni ghinta à casa ttuva,
gherimi tanti, 'un cì trasija nù chijùvu;
avijssi nà passiuna, nà cultura rara,
puri si di mistìjri facìjsi ù scarparu;
vulìjsi minti 'nsìjmi nà banda musicala
e nuvi, 'ndanti, n'imparavami i scali
i “do, re, mi, fa, sol”, croma e biscroma
e ara fin'i l'annu ni dunavisi ù diploma.
Gherisi gauti, u nasu parìa à chiav'i viulinu,
ma ùnn'à fatta à banda, unn'èra distinu.
Però nà lassatu ù gustu, cumi nà maggìa,
di capisci à musica, di canusci st'armunìa.